A bitácora de un de Ribeira

Porto deportivo de Cangas - Massó

2009-07-20T12:14:00.000-07:00

Quen queira saber o que está a pasar en Cangas, mellor que o vexa na páxina do Foro Social de Cangas. Non mires nos medios oficiais, que están a moverse moi lentamente á hora de informar, coma a xustiza á hora de resolver.

Con todo, o que aconteceu hoxe, traspasa os límites do crible. O SEPRONA (Servizo de Protección á Natureza da Garda Civil) levando presos ás persoas que están a defender o ambiente. Detiveron con violencia a 16 persoas, e algunha de elas como unha concelleira do grupo de goberno de Cangas e o portavoz do Foro Social de Cangas, aínda seguen detidos.

Veño de escribir o presidente o goberno de España solicitando entre outras cousas a dimisión do Subdelegado do Goberno, e que o SEPRONA se dedique ao fin para que foi constituído e non para deter ás persoas sensibles co ambiente.

Ti tamén podes facelo en jlrzapatero@presidencia.gob.es

Se non sabes que poñer podes inspirarte na miña carta:

Tractorada Virtual

2009-06-16T02:24:00.000-07:00

Eu súmome á tractorada deste mércores 17 convocada polo SLG baixo a demanda de prezos mínimos para o leite e a modificación das políticas agrarias.

Espazo de Saúde - Tempo de enfermedade

2009-06-04T00:05:00.000-07:00

Se vostede solicita cita hoxe para o meu médico de atención primaria do Centro de Saúde de Ribeira por Internet atoparase cas seguintes opcións:
- Poderá solicitar cita para o venres da vindeira semana (é dicir para dentro de 8 días e medio)
- Poderá solicitar cita para o luns día 15 e sucesivos ata o xoves 18 de xullo (dentro de entre once e catorce días e medio).

Claro que estas cousas pasan as veces cos sistemas informáticos. E ben podería ser que fora un erro na programación ou nas datas. Por iso chamei o servizo de citas centralizado (onde por sorte aínda atenden en galego). A resposta foi a mesma. Alí suxeríronme que fora ao Centro de Saúde a pedir cita. Seguro que poderían facerme un oco con outro médico ou médica. Mais no Centro de Saúde a resposta foi a mesma.

O curioso do caso, é o que pon baixo a data da cita. "O/a profesional non poderá atenderlle o día seleccionado. Remitiráselle a un/unha substituto/a."

Isto está ben. Decatáronse de que o meu médico da atención primaria non vai estar para a vindeira semana --ni para á seguinte-- e xa ten buscada á persoa que o substitúa.

É unha magoa que non me deran cita para dentro de dous meses, porque polo menos podería solicitar, segundo ten anunciado Feijoo, a atención nun centro de saúde privado.

Cidadáns de Ribeira, xa o saben, se ten previsto enfermar dentro de 15 días, vaian solicitando cita previa. Quedan avisados!

Unha campaña divulgativa polo municipio dará a coñecer entre os rianxeiros o banco de tempo

2009-02-06T07:29:00.000-08:00

Outro concello que xa conta cun bando do tempo é Rianxo. Agora está en marcha unha campaña para dalo a coñecer.

O Banco do Tempo noiés funcionará a finais de xaneiro

2009-01-19T14:07:00.000-08:00

El paso del tiempo de Josean Prado

É unha boa iniciativa a que está a poñer en marcha no Concello de Noia. Un banco do tempo. É coma a Axuda que funcionaba antes nas aldeas de Barbanza, pero máis moderna. Que ti sabes algo de informática e queres dar clases pola semana, pero necesitas alguén que coide ao teu can os fins de semana, pois te apuntas e intercambias horas de clase de informática con horas de paseo do can. Iso si, válenche o mesmo as horas de pasear o can que as de informática.

Podedes ler a nova na Voz:
El Banco do Tempo noiés funcionará finales de enero

Pobre Monte de San Alberte!

2008-11-10T01:19:00.000-08:00

LNG Tanker by Chablis2008

Hoxe La Voz titula: A planta de gas licuado de Ribeira situarase na zona de Xarás de Monte Alberte e custará 353.000 euros.
A nova contén varios erros. A planta situarase no Monte San Alberte, na parcela municipal. O polígono vaise estendendo polo monte coa complicidade de empresarios e políticos. O prazo de alegacións era de 20 días, mais remata hoxe. E supoño que a maioría dos ribeirenses non nos compensa o gas natural se é a costa dos nosos montes.

O cerco de Portosín denuncia que se segue pescando con dinamita

2008-11-09T04:07:00.000-08:00

O cerco de Portosín denuncia que se segue pescando con dinamita Que sigan a pasar estas cousas no século XXI e que non teñamos aprendido!

O hospital terá máis fondos que os de Cee e O Salnés no 2009

2008-11-09T03:59:00.000-08:00

La Voz de Galicia titulaba onte O hospital terá máis fondos que os de Cee e O Salnés no 2009. Porén advertía despois da discrepancia do deputado do PP: "Con todo, o portavoz parlamentario do Partido Popular, Manuel Ruiz, ten un punto de vista moi diferente sobre os orzamentos. O deputado afirmou onte que Sanidade segue condenando ao ostracismo ao hospital da Barbanza".

Nós temos que concordar co deputado do PP. O hospital non funciona moito mellor do que funcionaba cando gobernaban eles. As listas de espera son interminables, escandalosas e terceiromundistas; e o servizo de urxencias deixa moito que desexar.

Eu teño acudido alí co meu fillo que fixo unha escordadura nun pé, e estivemos a esperar por un traumatólogo catro horas. O meu fillo fixo unha reclamación por escrito, mais moitos meses pasaron dende aquela e nin sequera se molestaron en responder.

O outro día na obra teatral que representaron Mofa e Befa, un de eles sufrira un accidente e dicían: "lévao para Santiajo a que lle fajan unha radiografía, que se o levas aquí morre" Tiña gracia, se non fora porque aínda hoxe moitos pensamos que quizais en Santiago podamos atopar mellores prestacións que no Hospital da Barbanza.

Loita contra a polución

2008-11-08T11:23:00.000-08:00

Loita contra a polución

Na ANPA Caramecheiro do IES número 1 están a facer cousas interesantes para loitar contra a mudanza climática. Na nova non o din, a exposición fíxose en colaboración con Verdegaia.

O BNG de Ribeira solicita un plan para fomentar o uso do transporte público no municipio

2008-11-07T11:34:00.000-08:00

O BNG de Ribeira solicita un plan para fomentar o uso do transporte público no municipio. Por esta vez vou concordar con eles.

Hoxe quedei sen coche pois teño que reparar unhas deficiencias que atoparon na ITV. Chegar dende Castiñeiras ao meu traballo na Pobra é un auténtico suplicio. Polo mediodía que teño dúas horas para comer, mellor non pensar en ir comer a casa.

Ademais das medidas propostas polo BNG, eu demando unhas liñas máis amplas, que non morran na estación de autobuses, ou en todo caso, un billete único para viaxar dende unha parte do concello a outra. E ademais maior frecuencia e coordinación entre as liñas.

O Sergas defende o labor que realiza o hospital barbancés

2008-11-07T11:28:00.000-08:00

O Sergas defende o labor que realiza o hospital barbancés. Non podía ser doutro modo. Porén, o servizo do hospital segue a ser moi deficiente é as listas de espera dalgunha das especialidades son interminables.

O Concello de Ribeira envía á Xunta a súa proposta de terreos para a depuradora

2008-11-07T11:23:00.000-08:00

En La Voz de Galicia están a transmitir o intercambio de frases sen sentido entre o noso alcalde Torres Colomer e o Conselleiro de Medio Ambiente Manuel Vázquez: O Concello de Ribeira envía á Xunta a súa proposta de terreos para a depuradora. Falan de costas á cidadanía. Por sorte, as asociacións veciñais están a poñer un pouco de bo xuízo aos nosos políticos e tratando de que se atendan as súas peticións.

Banco de tempo en Boiro

2008-09-13T08:35:00.000-07:00

O Xornal Certo publica a nova de que xa está en marcha o banco de tempo en Boiro, aínda que é para toda a comarca da Barbanza. É unha moi boa iniciativa que de contar ca participación suficiente pode beneficiar moito as familias que o necesiten.

Os bancos de tempo xa funcionan en moitos lugares do mundo, e por suposto tamén en distintos lugares de España e de Galicia. O banco de tempo non é outra cousa que a boa veciñanza e a solidariedade entre as xentes que sempre funcionou.

Agardamos que teña moito éxito, pois sen dúbida, o éxito do banco do tempo será tamén o éxito da veciñanza do Barbanza

A ampliación do náutico tópase co rexeitamento do pleno de Ribeira

2008-07-17T23:51:00.000-07:00

Lemos na Voz de Galicia que A ampliación do náutico tópase co rexeitamento do pleno de Ribeira. O mesmo periódico que agora di que o pleno foi moi efectivo e que o pobo de Ribeira rexeita o Plano de Portos deportivos, fai so uns días dicía exactamente o contrario. Está ben que vaian rectificando.

Segundo o propio Plano Director das instalacións Náutico deportivas de Galicia tíñanse consultados aos Concellos para a súa elaboración. Parece que isto non foi así, polo menos no caso de Ribeira, senón non se comprende o actual rexeitamento. Se no principio apoiaban, e agora non, tamén está ben que rectifiquen.

Na páxina web do Bloque de Ribeira, tamén se informa das alegacións que eles ten presentadas.

Benvida sexa a oposición a un plano totalmente insostible que pretende, por unha banda destruír unha praia e un banco marisqueiro, e por outra ocupar os atraques do porto pesqueiro asignados a embarcacións tradicionais de pesca. Este último punto non está claramente matizado, pero parece que o Náutico, quere comezar a poñer "unha pica en Flandres".

Pola miña banda non puiden permanecer ao marxe deste asunto, e tamén presentei as miñas alegacións.

Residuos fecais alagaron dúas rúas de Ribeira tras dez minutos de choiva

2008-05-15T13:54:00.000-07:00

Sewer Spewing by Kmevans

Residuos fecais alagaron dúas rúas de Ribeira tras dez minutos de choiva. Isto é o que líamos esta mañá no periódico. Hoxe a tarde, parece que o problema xa estaba amañado... Na rúa de Padín e na Rosalía, mais non na praia da Batiola de Castiñeiras onde as augas fecais saían libremente.

Agardemos que o SEPRONA poña fin a estes abusos. Os verquidos hai que controlalos onde se producen, e non desvialos para o rural.

O plan de ampliación das instalacións náuticas NON satisfai á sociedade barbancesa

2008-04-19T15:52:00.000-07:00

Boats in the marina in Sausalito, California. March 2007. By wili hybrid

Hoxe A Voz de Galicia despáchase con este titular:
O plan de ampliación das instalacións náuticas satisfai á sociedade barbancesa
E digo eu ¿A quen ten preguntado? Porque a min non. E supoño que tampouco aos mariscadores que cada vez ven máis escasas as súas zonas de marisqueo, nin aos ecoloxistas que cada vez ven máis deteriorado o noso litoral, nin ao público en xeral, que ve como o dominio público marítimo se privatiza a favor dos que ten máis cartos, nin aos mariñeiros, que ven como os espazos nos peiraos son cada vez máis reducidos para eles.

Eu, señores da Voz, lamento que aumente o número de amarres dun xeito tan xeneroso.

Marbellización do Barbanza

2008-04-16T12:15:00.000-07:00

El grupo interesado en construir un hotel en Barbanza busca posibles ubicaciones.

Por se Barbanza non está xa abondo danada, agora quérennos facer tamén un campo de golf.

As paralizacións non foron porque se decataran de que a cidadanía estaba farta.

2007-12-17T13:53:00.000-08:00

O executivo sonense paralizou unha urbanizaci�n en Eiravedra

Mediou unha denuncia dun particular. Os Gobernos do Concello parece que non se decatan de nada. Nin os de agora, nin os de antes.

Pobriños promotores! Cometeron un erro e no proxecto que remitiron a patrimonio esqueceron poñer dúas vivendas, que si puxeron no proxecto do Concello.

O Alcalde di que non descarta (supoñemos que se poñen máis denuncias) paralizar máis obras. ¡Pobriños promotores!

O executivo sonense paralizou tres promocións inmobiliarias

2007-12-17T13:33:00.000-08:00

Un complexo de chalés preto do Pozo é a terceira promoción que paraliza o executivo sonense

Mágoa que non o fixeran antes. Penso que xa se decataran de que parte da cidadanía está absolutamente horrorizada das desfeitas urbanísticas. Aínda hai moito que parar.

A xuventude e o deporte

2007-09-27T09:37:00.000-07:00

Carta ao Concello

Boas tardes,

Acabo de recibir o programa de actividades deportivas do Concello. Penso que para o noso Concello a oferta podería ser mellorada ca participación de asociacións deportivas, con mellor vontade política e maior asignación orzamentaria.

Mais non é de iso do que quería falar. O que boto a faltar é calquera tipo de actividade para os xoves de máis de 15 anos. ¿É que os xoves non ten necesidade de facer deporte? Pola contra, penso que son os xoves destas idades os que máis o necesitan, mais non hai absolutamente nada que podan facer programado polo noso Concello.

E non creo que podamos poñelos nas actividades dos adultos. Eles para participaren necesitan de actividades propias.

Por se isto fora pouco, non poden beneficiarse das instalacións da Fieiteira, pois para usalas ten que estar acompañados un maior. Refírome en concreto as salas de aparatos de musculación e ximnasia que alí se atopan.

E iso se falamos de Santa Uxía de Ribeira, porque nas parroquias do Concello a falta de ofertas é total. Ademais o transporte é caro e malo. Un rapaz de Castiñeiras, Aguiño, Carreira, etc para chegar ao instituto ten que coller dous autobuses o que supón que nun so día que teñan clase de mañá e de tarde ten que gastar oito euros en autobús e perder en ocasións máis de dúas horas do seu tempo. En fin...

De certo que estamos a poñer aos nosos xoves as cousas moi difíciles. Logo queixarémonos de que so queren "botellón".

Agardo que fagan algo para mellorar a situación,

Unha aperta,
Ignacio Jorganes
Castiñeiras

Ecoloxistas presentan alegacións o plano de Acuicultura da Xunta

2007-08-30T17:00:00.000-07:00

Captura da páxina web de ADEGA

Verdegaia e ADEGA presentaron cada un súas alegacións contra o Plano de Acuicultura da Xunta.

Na páxina de ADEGA pódense consultar as súas alegacións, e na de Verdegaia un resumo das mesmas.

Verdegaia aposta pola finalización da actividade de aquelas piscifactorías que estean situadas na Rede Natura unha vez finalice o período de concesión das mesmas. Isto incluiría por exemplo á piscifactoría de Couso no noso Concello.

Piscifactorias

2007-08-29T13:46:00.000-07:00

Mapa capturado da páxina da Plataforma Medioambiental de Corrubedo

Parece que a veciñanza de Corrubedo está a moverse co tema das piscifactorías.

Os empresarios alegan que dan moito traballo, mais hai quen comenta que ca subvención que tivo Pescanova para a súa planta de Mira en Portugal, terán os salarios de todos os seus traballadores durante 15 anos. ¡Así calquera é empresario!

Por certo, que a min non me gustou nada a chulería ca que Pescanova dixo que levaba os seus cartos para Portugal, e dende aquela xa non merco produtos da citada empresa. Se eles conxelan as súas inversións en Galiza, eu conxelo as miñas inversión en Pescanova, mais outros danlles medallas…

Agora, aos veciños de Corrubedo quérenlles expropiar os seus terreos para montar unha piscifactoría. É como se a ti van e díxenche que te vaias da túa casa que hai un empresario que quere poñer un bar. Polo morro. Expropian un ben privado para o seu uso privado. Caro que como din unha boa amiga o que é privado é o negocio e máis os beneficios, que os gastos pagámosllos entre todos cas subvencións.

Os veciños de Ribeira ven de presentar 3.000 sinaturas e 400 alegacións en contra do plan. Agardamos que esta desfeita non siga adiante.

Sobre o tema das piscifactorías hai moito que falar. Se teño tempo, noutra entrada xa poñerei algo máis sobre o risco medio-ambiental que supón e o bacallau que están a vendernos. Mentres tanto, ide vindo este documenta que fixeron na televisión portuguesa. É un pouco longo, mais paga a pena.

Primeira parte:

Segunda parte:

Hai dereito?

2007-08-23T16:00:00.000-07:00

Hoxe só dous artigos do Código Penal Español, e un da nosa constitución que convén que coñezan os funcionarios da nosas administracións.

Artículo 329 del Código Penal Español

1. La autoridad o funcionario público que, a sabiendas, hubiere informado favorablemente la concesión de licencias manifiestamente ilegales que autoricen el funcionamiento de las industrias o actividades contaminantes a que se refieren los artículos anteriores, o que con motivo de sus inspecciones hubieren silenciado la infracción de Leyes o disposiciones normativas de carácter general que las regulen será castigado con la pena establecida en el artículo 404 de este Código y, además, con la de prisión de seis meses a tres años o la de multa de ocho a veinticuatro meses.

2. Con las mismas penas se castigará a la autoridad o funcionario público que por sí mismo o como miembro de un organismo colegiado hubiese resuelto o votado a favor de su concesión a sabiendas de su injusticia.

Artículo 404 del Código Penal Español

A la autoridad o funcionario público que, a sabiendas de su injusticia, dictare una resolución arbitraria en un asunto administrativo se le castigará con la pena de inhabilitación especial para empleo o cargo público por tiempo de siete a diez años.

Art. 45 de la Constitución Española

Todos tienen el derecho a disfrutar de un medio ambiente adecuado para el desarrollo de la persona, así como el deber de conservarlo.
Los poderes públicos velarán por la utilización racional de todos los recursos naturales, con el fin de proteger y mejorar la calidad de la vida y defender y restaurar el medio ambiente, apoyándose en la indispensable solidaridad colectiva.
Para quienes violen lo dispuesto en el apartado anterior, en los términos que la ley fije se establecerán sanciones penales o, en su caso, administrativas, así como la obligación de reparar el daño causado.

A bitácora doutro de Ribeira

2007-08-21T13:19:00.000-07:00

Dixéronme o outro día que a meu caderno de bitácora ten o mesmo nome que a doutro blogero xa famoso por estes lares.

Cando escollín o meu nome, non o pensei demasiado. Quería que as miñas verbas saísen do corazón e non poñerme a pensalas demasiado. Velaí porque este caderno de bitácora de seguro que está cheo de erros e inexactitudes.

Velaí tamén, porqué collín este nome para o meu caderno de bitácora. Foi sen pensar. So tiña ganas de sacarme do peito a sensación de non ser de ningures, e pertencer a terra na que vivo, traballo dende fai xa máis de dezaoito anos. Xa chega. Esta non é so a terra a que xuridicamente pertenzo, se non tamén a terra que veu nacer ós meus fillos e a que sinto agora como propia.

Por iso perdoade a traizón do meu subconsciente. A bitácora de Paleón léoa dende os seus comezos, e seguro que por iso se deslizou o seu apelido sen querer. Esta tiña que ser a bitácora doutro de Ribeira.

Vecinos de Corrubedo reclaman un plan de ordenación do lugar

2007-07-31T09:25:00.000-07:00

Parécenos que algo está a moverse no noso Concello de Ribeira. Hoxe léese na Voz de Galicia. "Vecinos de Corrubedo reclaman un plan de ordenación do lugar. Creouse unha plataforma medioambiental de Corrubedo que está a defender o Parque.

Xa o pasado sábado estaban a pedir firmas pola defensa do Parque e rexeitando a creación de piscifactorías no lugar. O portavoz da plataforma argumenta que estas plantas crean moi poucos postos de traballo, e pola contra destrúen moitos.

Tamén os veciños de Aguiño están a mobilizarse en contra do proxecto de depuradora que o Concello está a planear para o tratamento das augas residuais. Hoxe, a Comisión creada, presentou moitas sinaturas contra dito EDAR no Concello.

O EDAR é necesario, mais tamén é necesario que as augas residuais procedentes da industria, sexan tratadas antes do vertido, e que sexan segregadas das augas residuais urbanas.

Tamén faría falta que as augas pluviais foran separadas, se non queremos que aconteza no noso Concello o que está a acontecer en Vigo.

Tamén se esixe que a descarga final das augas depuradas se afaste o máis posible de terra, xa que o vertido está previsto a só catro metros de profundidade.

A Bandeira Azul non é garantía dun litoral ecolóxico

2007-06-28T13:53:00.001-07:00

O título da miña entrada de hoxe reflicte o título dun artigo que sacou hoxe ADEGA. Paga a pena leelo.

É claro, que a bandeira azul da que tanta propaganda fan os nosos Concellos non é garantía de cumprimento das leis de protección ambiental ou do litoral.

Esto está a suceder no noso Concello que no que enriba das praias que locen as bandeiras azuis, como esta do Touro, estanse a construír inmensas moles de edificios que as fan sombra.

Tamén nesa mesma praia estase a destruír un piñeiral, para a construcción de 6 bloques (36 vivendas), nunha zona de protección de costas e de protección da paisaxe. A desfeita está consumada, e a outra tarde cando ía para Ribeira vin un esquío a correr pola estrada nesa zona. Quedara sen hábitat!

O único parámetro ambiental que mide o organismo encargado de outorgar as bandeiras azuis é a calidade das augas. Outra das praias que tivo a bandeira é a Praia da Ameixida, que é unha praias noxenta na súa cara norte. Nela os vertidos urbanos van directamente ás rochas que hai por riba da praia. Mais xa se sinala no artigo de ADEGA que "os criterios que segue para outorgar este distintivo, como símbolo de calidade de praias e augas, carecen de suficiente rigor."

Foto da praia da Corna, no Caramiñal, bandeira azul, capturada da páxina web de ADEGA

Parece que a bandeira azul, non é unha garantía de calidade ambiental. Por contra, estas praias abondan ter grande cantidade de vehículos estacionados nas súas proximidades na época estival, limpeza mecanizada que dana o ecosistema mariño, e outros servizos como chiringuitos ou outro tipo de construccións que danan a paisaxe e o ecosistema.

O mapa da especulación en Ribeira

2007-06-27T10:20:00.000-07:00

Imaxe capturada da páxina de información urbanística de Galiza

Fai uns poucos días quedei abraiado o ver o mapa do planeamento urbanístico de Ribeira. Agás o Parque Natural das dunas de Corrubedo e lagoas de Carregal e Vixán, a maioría das zonas urbanizables están preto da costa (en violeta no mapa).

Un muro de ladrillo está a levantarse entre o noso concello e a Ría de Arousa.

«O que procuramos é que os nosos socios vivan do marisqueo»

2007-06-19T20:00:00.000-07:00

Foto de www.pescagalicia.com

Hoxe puiden ler na Voz de Galicia que o que máis preocupa ao novo presidente da agrupación de mariscadores de Ribeira é a contaminación da Ría, mais ben con bos ollos que a Xunta queira saneala e evitar os verquidos ao mar.

A actividade extractiva podería chegar a pararse se a contaminación é elevada, e de feito, o reló xa non pode extraerse pola gran contaminación que ten por chumbo.

Están a procurar a recuperación de zonas que antes eran productivas e agora non debido á contaminación, e facer rendible a súa actividade con unha mellor calidade do producto.

O colectivo conta con 300 persoas, mais só rematan a temporada unha terceira parte porque non é rendible.

Verdegaia

2007-06-15T23:32:00.000-07:00

A pasada semana a miña moza e máis eu tíñamos algo que celebrar. Por iso hoxe quero facerme un agasallo e tamén facelo a ela. Xa o tiñamos falado, mais aínda non tomaramos a decisión.

Un só pode facer moitas cousas, pero é necesario xuntar as mans para defender a natureza contra a cobiza humana. Por iso hoxe regaláramos pertencer a Verdegaia.

Gústame os seus principios, e o seu ideario. Agora só queda agardar a que podamos xuntarnos un pequeno grupo de socios nesta comarca para así organizar unha coordinadora local no Barbanza. O principio da acción de Verdegaia está baseada no lema pensando globalmente e actuando glocalmente (local e globalmente).

A defensa do Común

2007-06-07T15:43:00.000-07:00

Este é o último vídeo dos de Cangas. Nel falan de dous cousas moi importantes.

Por unha banda está o Común. Así con maiúscula, ou o Ben Común. Como o seu propio nome indica o Común no é nin pode ser privativo de ninguén. É un ben público, que pertence a todos. Non pode ser privatizado, como non poden ser privatizadas como non se pode privatizar unha lingua, nin as matemáticas nin os algoritmos informáticos (¿non é?). Todo isto, que non ten porqué ser algo material pertence o Común. Os bosques comunais, as ribeiras do mar e dos ríos (e a súa paisaxe), ou a alta mar. Por desgraza, e debido o abuso duns poucos sen escrúpulos que malgastan estes recursos que pertencen a todos, este Ben Común cada día é menos ben e está máis privatizado.

Por outra banda, é importante subliñar que solo ca unión do pobo é posible chegar a facer algo para parar os abusos urbanísticos. A denuncia non é de abondo. Comentaba no vídeo un home que só trala mobilización puxéronse en marcha os xuíces que tiñan as denuncias arquivadas.

Hoxe lin que "O alcalde de Carnota denuncia presións das inmobiliarias". Por outra banda os veciños están preocupados. Aínda o Concello de Carnota mantense virxe, mais ven imparable polo cambio no Concello o desenvolvemento urbanístico esaxerado. Eu penso que aínda se pode frear esa tendencia. Vexan os comentarios neste post de Cabaseira Web. Moitas ideas enchéndoa, agora que se usan para adornar.

Investigan irregularidades urbanísticas no Grove

2007-06-01T05:20:00.000-07:00

Por esta nova souben que hai un Grupo de Delitos Urbanísticos da Garda Civil, e polo que parece están a traballar. Non é mala cosa. Parece que están a interrogar os membros da oficina do aparellador municipal do Grove. Agardo velos traballar tamén noutros concellos.

La Voz de Galicia conta esta nova moito mellor.

As novas de hoxe

2007-05-31T22:17:00.000-07:00

A imaxe representa a evolución dos prezos por metro cadrado dun piso en Ribeira segundo unha inmobiliaria que se anuncia por Internet. A columna laranxa representa unha oferta dunha casa que salio hoxe.

No vídeo que colguei onte, e tamén no preámbulo da Lei de Medidas Urxentes de Ordenación do Territorio e do Litoral, falábase de que as urbanizacións desordenadas non son boas para os pobos. Por certo, que xa colgarei a continuación do vídeo.

Hoxe, atopo en La Voz de Galicia dúas novas moi relacionadas co vídeo. Por unha banda esta nova fala de que a hipoteca media no Barbanza encareceuse 180 euros dende o ano 2005, e que para un préstamo de 130.000 euros, fan falta 650 euros ó mes, e para pagar só a suba que tiveron por termo medio as hipotecas este ano fai falta un soldo completo dun empregado que cobre o salario mínimo interprofesional.

Claro que vostedes dirán que ninguén que cobre o salario mínimo interprofesional pode meterse nunha hipoteca, e non lles falta razón. De feito ningún banco llela daría. Pero é que ademais, segundo esta outra nova, as rendas das xentes de Noia e Barbanza están entre as dez máis baixas de Galiza. Tendo en conta os niveis de ingreso na zona farían falta as mensualidades de 13 anos íntegros para pagar unha hipoteca de 130.000 euros. Esa hipoteca representa o 80% do prezo medio dun piso na comarca.

Eu non estou en contra de que se constrúa na comarca, pero penso que é necesario frear a especulación e dedicar o solo as xentes que están a vivir aquí. É necesario un novo plan urbanístico racional para un desenvolvemento sostible das nosas cidades.

Finalmente, nesta outra nova din: "¿quen son os potenciais compradores dun apartamento de 50 metros cadrados polo que se abona 120.000 euros? Madrileños, valisoletanos e leoneses son os que buscan nesta zona do litoral o espazo ideal para pasar as vacacións. Sen esquecernos dos ourensáns."

Lei de Medidas Urxentes de Ordenación do Territorio e do Litoral

2007-05-30T15:35:00.000-07:00

Video: Documental de Alternativa Canguesa de Esquerdas Cangas do Morrazo 2007 Un Novo Plan 1ªParte ACE na Rede: http://acealternativa.wordpress.com/

Púxenme a investigar. Só fai uns poucos días —o pasado día 17 de maio— entrou en vigor a Lei de Medidas Urxentes de Ordenación do Territorio e do Litoral (PDF). No preámbulo da Lei di que tal e como están a facerse as cousas imos sufrir graves prexuízos económicos, sociais e ambientais. O modelo de construcción non é eficiente, pois a dotación de infraestructuras adecuadas (accesos, comunicacións, rede sanitaria, enerxía, etc.) é moi caro; créanse urbanizacións que non son accesibles as economías dos mozos das áreas nas que se constrúen, creándose ghetos para os turistas; deteriorase a paixase e acabase cos espacios verdes ca diversidade, cos modelos urbanísticos e económicos tradicionais, etc.

Segundo esta nova lei: «Suspéndese a tramitación e aprobación dos plans especiais de reforma interior, plans parciais, plans de sectorización e instrumentos de equidistribución que teñan por obxecto a transformación urbanística de terreos situados a unha distancia inferior a 500 metros, medidos en proxección horizontal terra a dentro, desde o límite interior da ribeira do mar dos municipios que se relacionan no anexo».

E logo ¿por qué?

2007-05-29T05:38:00.000-07:00

Algún acontecemento recente fixo que eu empezara a escribir esta bitácora sobre algunha cousa que acontece no Concello de Ribeira, e máis en concreto na miña parroquia de Castiñeiras.
O pasado venres día 25 de maio, nunha leira da rúa na que resido vin que estaban a poñer unhas marquiñas no chan e que sacaran o peche da mesma. Iso non ten nada de particular, especialmente nas áreas preto da costa. Supoño que xa tedes oído que nas costas de Galiza están a crecer novas construccións como cogomelos. O que me fixo sospeitar é que fora precisamente na véspera das elección municipais. E logo, ¿por qué ían estes a comezar as obras xusto nun venres antes das elección?